Plantun de Prouvènço

Pèr coumpara dos planto d'encò nostre

Plantago albicans & Myosotis arvensis

Plantago albicans

Plantaginaceae

Nom en français : Plantain blanchissant.

Descripcioun :
Lou plantage-blanquejant es uno planto à rizoumo que trachis en coulounìo dins li tepiero seco proche de mar, sus la sablo argielouso. Es uno planto pulèu raro que se vèi subretout proche la mar de Berre. Se recounèis à si fueio blanco cuberto de péu e à sa longo coua (enflourejado).

Usanço :
Dèu agué li mémi prouprieta que si cousin, pamens estènt un plantage pulèu rare, vau miés lou pas acampa.

Port : Erbo
Taio : 10 à 50 cm
Fueio : basalo
Tipe bioulougico : Camefite
Cicle bioulougico : Planto renadivo

Gènre : Plantago
Famiho : Plantaginaceae

Ordre : Lamiales

Coulour de la flour : Brunello
Petalo : 4
Ø (o loungour) enflourejado : 1 à 7 cm
Flourido : Printèms - Estiéu

Sòu : Ca
Autour basso e auto : 0 à 600 m
Aparado : Noun
Abriéu à óutobre

Liò : Tepiero seco - Argielo - Sablo
Estànci : Termoumediterran à Mesoumediterran
Couroulougi : Estenoumediterrano
Ref. sc. : Plantago albicans L., 1753

Te-vese-e-t'ame(-de-champ)

Myosotis arvensis

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis des champs, Myosotis intermédiaire.

Descripcioun :
Aquéu te-vese-e-t'ame trachis di plano de coustiero fin qu'en mountagno. Es uno planto coumuno, mai pas toujour eisado de destria de si cousino. Dins lou group di flour pichoto (1 à 4 mm), soun pulèu li mai grando, si cambo soun un pau mai espésso (> 1mm), e emé d'enflourejado que fan mens de la mita de la planto. Se recounèis classicamen que li pecou di flour d'en bas dèvon èstre dous cop mai long que li sepalo di flour, mai sèmblo pas toujour lou cas.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").